Piokalafi ‘a ‘Ana Fusi Mafi

HILI KOLOSI Ē, MA’U ‘A E KALAUNI

‘ANA FUSI MAFI

TUPU’ANGA:

Na’e tupu hake ‘a ‘Ana Fusi Mafi ‘i he ongo matu’a ko Viliami Feke ‘o Mataika Vava’u′ pea mo Kalolaine Lose Taufa ‘o Tongamama‘o Niua Fo‘ou.
Na‘e fa‘ele’i ‘a ‘Ana Fusi ‘i he ‘aho 03/02/1972, pea ko e fika Ua ia ‘i he fanau ‘a Viliami Feke mo Kalolaine Lose Taufa.

Na‘a ne ako pe ‘i he G.P.S ‘a ‘Alele ‘i Niua Fo’ou pea ne hū mei ai ki he Kolisi ‘a e Siasi Uesiliana ‘i Niuafo’ou′ pe na’e ui ko Taone, pea ma’u ai hono faingamalie ‘o ne hiki mai ai ki Tonga′ni ‘o ako he Ako‘anga Ma‘olunga ko Tupou.

Na’e ma’u hoa ‘a ‘Ana Fusi kia Hopoate Mafi ‘o Houma ‘Eua, lolotonga ‘oku ngāue ‘a Hopoate ‘i he Kolisi Ko Tupou′.

Na’e fakakoloa kinaua ‘aki ‘a e ki’i tamasi’i pe ‘e toko taha (Simote Talanoa Mafi) pea′na ohi ai ‘a e ki’i ta’ahine na’e fakahingoa kia ‘Ana ko ‘Ana Fusi Foster ke ua ‘aki ‘a Simote. Na’e malōlō (pekia) ‘a e ongo tuofefine ‘o Hopoate pea toe ‘omi ai mo e fānau ko ia′ ‘e ‘Ana ‘o tauhi, Mele Popua Tupou, Taniela Tupou, Kilisitina Tupou, Talanoa Tupou pea mo Finau Fuapau mo Viliami Fuapau.

Lolotonga ‘ena ngāue ‘i he Kolisi Ko Tupou, na’a′na ma’u faingamālie ai ke na hū ki he Kokisi Ko Sia’atoutai ‘i he 2008-2010. Hili ia na’a′na toe foki pe ki he Kolisi Ko Tupou ‘i he 2011 ‘o a’u mai ki he malōlō(pekia) ‘a ‘Ana Fusi Mafi ‘i he ‘aho 6 ‘Akosi 2012.

Ko e fefine mo’ui fiefia, pea na’e hoko ‘ene mo’ui fiefia ko e ma’uma’uluta’anga ia ki hono famili. Na’a′ne fiefia ke tokoni mo fakama’ama’a fatongia ki hono Husepaniti he ngaue na’a′ne fai. ‘Io, Na’e ‘ikai ngata pe ‘i hono famili, ka na’a ne fiefia ke kau ‘i he ngaahi fatongia mo e ngaahi feohi’anga ‘a e Kolisi ko Tupou.Na’e mahulu atu ‘a ‘ene fiefia ke kau ‘i he ngaahi feohi’anga Faka-Laumalie ‘a e Kolisi Ko Tupou′, ‘io he hiva′, ‘i he Kaluseti′, ‘i he Akotapu′, ‘i he Lotu Hūfia′, ‘i he Failautohi Faka-Sapate′ pea ko e Fefine Malanga Hoko′

Ko ‘ene Folofola Manako:      Saame 23, Himi manako:            400

‘Oku ‘oatu heni ‘a e fakamālō ki he Tangata’eiki Palesiteni ‘o e Siasi′, Sekelitali Lahi′, Palesiteni Ako′ mo e ‘ofisi ako ‘a e Siasi′ ki he Puleako Kolisi Ko Sia’atoutai mko tokoni Pule, Tiuta Lahi mo e Kau Faifekau′, Kau Ngāue′ mo e fanauako′, ki he Puleako ‘o e Kolisi ko Tupou′, Ongo Tokoni Pule′, Tiuta Lahi′, Pule Faama mo e Kau Faifekau′, Mafi ki Ha’amea mo Mafi Lekeleka mo e kau Ngāue kae’uma’ā ‘a e Kau Fefine tau ma’a e Kolosi ‘a e Kolisi ko Tupou′. Pea ki he Matāpule Lahi′, Kau Matāpule pea mo e fanauako ‘o e Kolisi Ko Tupou.

Pea ke a’u atu ‘a e fakamālō′ni ki he ongo famili ‘o e pekia (‘Ana Fusi Mafi) pea kia Rev. Dr Tevita Palefau, Siosi Palefau mo e famili′, Paula Bloomfield mo Siosi’ana mo e famili, Kolini Vaea mo Lepaola mo e famili′, pea kia Taka-‘i-Houma pea mo e famili ‘o e Husepaniti.
Pea ki he maheni mo e ngaahi kaungame’a ‘o e pekia pea ki he kau Kolisi Tutuku mo e Kainga ‘ofa Kotoa pe na’a mou tokoni mai, Mo’oni ‘oku ‘ikai teu ma’u ha lea fe’unga ke fai atu ‘aki ‘a e fakamālō′ni, ka ‘oku fai atu ‘aki ‘a e fakamālō′ni ‘aki ‘a e loto hounga’ia mo’oni ‘i he ‘ofa mo e tokoni na’a mou fai, kae tuku mu’a ki he ‘Otua Mafimafi Kene fakahoko atu ‘a e fakamālō′ni.

Toka ā ‘Ana Fusi Mafi ‘i he nonga mo e fiemalie ‘a e ‘Otua.

‘Ofa lahi atu ‘Aupito,

Mei he Uitou (Hopoate Mafi) mo e fānau hono kotoa.

Leave a Reply